Related Posts
Category : Sports
IND vs ENG – અંતિમ 5 ઓવરમાં ઇંગ્લેન્ડ હાર્યુ ,તિલક વર્મા સારુ રમ્યો
ભારતીય ટીમે ઈંગ્લેન્ડ સામેની T20 શ્રેણીની બીજી મેચ બે વિકેટથી જીતી લીધી છે. 25 જાન્યુઆરી (શનિવાર) ના રોજ ચેન્નાઈના એમએ ચિદમ્બરમ સ્ટેડિયમમાં રમાયેલી આ મેચમાં યજમાન ટીમને જીતવા માટે 166 રનનો ટાર્ગેટ હતો, જે તેણે છેલ્લી ઓવરમાં હાંસલ કરી લીધો હતો. આ જીત સાથે ભારતીય ટીમે પાંચ મેચની T20 શ્રેણીમાં 2-0ની લીડ મેળવી લીધી છે. T20 શ્રેણીની ત્રીજી મેચ 28 જાન્યુઆરી (મંગળવાર)ના રોજ રાજકોટના સૌરાષ્ટ્ર ક્રિકેટ એસોસિએશન સ્ટેડિયમ ખાતે રમાશે.
ભારતીય ટીમ માટે આ મેચ બિલકુલ સરળ ન હતી. કોલકાતા T20માં ભારતીય ટીમે સરળતાથી વિકેટનો પીછો કરી લીધો હતો, પરંતુ ચેપોકમાં સ્થિતિ અલગ હતી. જ્યારે ભારતીય ટીમ રનનો પીછો કરવા ઉતરી ત્યારે તેણે શરૂઆતથી જ વિકેટ ગુમાવી દીધી હતી. એક સમયે ભારતીય ટીમની 5 વિકેટ 78 રનમાં પડી ગઈ હતી, આવી સ્થિતિમાં એવું લાગી રહ્યું હતું કે રમત તેમના હાથમાંથી સરકી ગઈ છે, પરંતુ તિલક વર્માના ઈરાદા બીજા જ હતા. ‘પ્લેયર ઓફ ધ મેચ’ તિલકને આ મેચમાં ત્રીજા નંબર પર બેટિંગ કરવા મોકલવામાં આવ્યો હતો અને તેણે કેપ્ટન સૂર્યકુમાર યાદવના નિર્ણયને યોગ્ય ઠેરવ્યો હતો.
ભારતે જીતવા માટે છેલ્લી 5 ઓવરમાં 40 રન બનાવવાના હતા અને તેની ત્રણ વિકેટ હાથમાં હતી. મતલબ કે અહીં ફરીથી ઈંગ્લેન્ડનો હાથ ઉપર હોય તેવું લાગતું હતું. જોફ્રા આર્ચરે ભારતની ઇનિંગ્સની 16મી ઓવર ફેંકી હતી, જેમાં તિલક વર્મા અને અર્શદીપ સિંહે મળીને 19 રન બનાવ્યા હતા. આર્ચરની તે ઓવરમાં તિલકે બે સિક્સર ફટકારી હતી જ્યારે અર્શદીપે એક ફોર ફટકારી હતી.
હવે ભારતને 24 બોલમાં માત્ર 21 રન બનાવવાના હતા. ઇનિંગની 17મી ઓવર સ્પિનર આદિલ રાશિદે ફેંકી હતી, જેમાં તેણે માત્ર 1 રન આપ્યો હતો અને અર્શદીપની વિકેટ પણ લીધી હતી. રાશિદની તે શાનદાર ઓવરને કારણે મેચમાં વધુ એક વળાંક આવ્યો. હવે રવિ બિશ્નોઈ તિલકને સમર્થન આપવા મેદાનમાં આવ્યા. ત્યારબાદ 18મી ઓવરમાં રવિ બિશ્નોઈએ ચોગ્ગો ફટકાર્યો હતો. બ્રેડન કાર્સે ફેંકેલી તે ઓવરમાં કુલ 7 રન બનાવ્યા હતા. હવે ભારતે જીતવા માટે છેલ્લી બે ઓવરમાં 13 રન બનાવવાના હતા.
ઇંગ્લિશ કેપ્ટન જોસ બટલરે 19મી ઓવર પાર્ટ ટાઇમ સ્પિનર લિયામ લિવિંગસ્ટોનને આપી. તે ઓવરમાં પણ સાત રન થયા હતા. જેમાં બિશ્નોઈના બેટમાંથી ચાર અને તિલકના બેટમાંથી ત્રણ રન આવ્યા હતા. હવે છેલ્લી ઓવરમાં ભારતને જીતવા માટે 6 રનની જરૂર હતી. જિમી ઓવરટોનની તે ઓવરના પહેલા બોલ પર તિલક 2 રન લીધા હતા. ત્યાર બાદ તિલકે આગલા બોલ પર ચોગ્ગો ફટકારીને ટીમને જીત અપાવી હતી. તિલક વર્માએ 55 બોલમાં અણનમ 72 રન બનાવ્યા જેમાં 5 સિક્સ અને 4 ફોરનો સમાવેશ થાય છે. રવિ બિશ્નોઈ 9 રન બનાવીને અણનમ રહ્યો અને તેણે તિલકને સારો સાથ આપ્યો.
Load more
